Broom

BROOM

     Hmunphiah hi a Botanical name chu Thysanolaina maxima a ni a, Graminae hnim chhungkua a mi a ni. A tlangpuiin a kung hi Meter hnih leh a chanve vela sang a ni thei a, hmun hniam leh hmun sangah a chin theih a. A tlangpuiin, van in hawngzau hmun te, tlangpang awih ah te leh thingtlang lo neihna hnu/chul leh motor kawngan ah te hmuh tur a tam hle a ni.

     Hmunphiah hi Pioneer Species an tih zingah a pawimawh ber pawl a ni a, chumi awmzia chu leimin nasa tak a lo awmin emaw ram ruak a lo awmin chumi ram ruak a hnim lo to hmasa ber zingah chuan Hmunphiah a lo tel ngei thin. Lei thar, hnawnna pawh nei lo, khawro leh nisain a em ro vek hmunah pawh hmunphiah chuan bul a va tan ta thin a ni.
   
     Mizoram ah hian Hmunphiah kan hmang nasain a tangkaina pawh kan hre hle a.  Amaherawhchu kan hmunphiah hmante hi a tlangpuiin ramhnuai a mi kan lakkhawm/ sengkhawm te a ni hlawm a, mumal zawk leh belhchian dawl hmunphaih hmun atanga sengkhawm hi chu a la tam lo hle a ni.

     Hmunphiah hi lei luangral humhalhna atan tangkai tak a ni a, chhungtin mamawh a ni a, chuvangin hmunphiah hmun siam hi eizawnna tlakin a hlawk chho tawlh tawlh dawn a ni. A hnah hi ranchaw ; abikin bawng leh kel chaw atan a tha em em a. A kung hi Fibre hlang deuh thaw a nih avangin lehkha puan siamna (paper factory) a hralh nghal mai theih a ni.

     Hmunphiah hmun neih hi taimak ngai leh enkawl fel ngai tak a ni a, tih mai mai a hlawhtlin theihna chi a ni lo. Zuamsual awl tak a ni a, ‘Hmunphiah ka phun tawh a, a vuih hunah ka zuk kek mai ang. Engmah tih a ngai lo’ titu chu a hlawhchham sa a ni.

     Pang, Phunchawng, Vaube, Khawmhma, Fartuah leh Khaukhim te hi, ramhnuaia hmunphiah te nena to za an ni a, chuvangin, hmunphiah hmunah chuan ramkang ngam deuh Pang/Phunchawng hi 100 nos./Hectare phun tel ni sela kan tu leh fa te leh ram tan a tangkai a rinawm.

HMUNPHIAH CHINDAN LEH ENKAWL DAN

I.   LEILUNG BUATSAIH (Site preparation)

   i) Fai taka lo vah a, perh te leh hruizam pawh/ phih fai vek tur a ni. Hal hun pangngai ah lo chu hal tur a ni.

   ii) Kangvarah thlam rinawm tak sak ngei ngei a ngai. A kumhnih (2) naah hmunphiah in sak a ngai, hei hi hmunphiah tih ro nan emaw phoro tawhsa dahkhawmnan hman tur a ni.

   iii) Kangvarah chuan hmunphiah, Luang leh rairuang te a lo chawr a nga. Hmunphiah chu a lane dika a awm chuan humhalh a, Luang leh Rairuang te chu a bulah kar emaw hlotur (weedicides) a kah hlum tur a ni. A awmsa ring lova phun thar hi a tha ber.

   iv)A ram awih dan a zirin contour terrace ft 9 danah ft3 (leivung tel lovin) vela zau laih tur a ni. Heihi leilung venhimna atan leh hmunphiah hmun kan enkawl chhung zawng veivah velna atan a ni.

   v) Terrace zawl ko thlang lamah ft6 inkar hlatin hmunphiah chu phun tlar tur a ni a. Hetiang spacing ah hian Hectare khat (Tin 2½ hmun) ah kung 1650 vel a phun theih.

II   A CHI LAK DAN :

     A ram to, a hunga kar mai tur a ni a. Chu chu cheh darh a, chumi hnuah kutin thehdarh tur a ni. A thlar (sawhthing thlar ang) khat kha bikhat tur a ni. Thlar khatah kung khat (1) atanga kung li (4) vel awm thei sela, a zat chiah a sawi theih loh.

     A kung kha inches 6 velah tan la, a zung hnawk sin zualte pawh tan fai veka phun tur a ni. Thingtum sahchhanah chem hriam taka sah chhum zung zung mai tur a ni.

     Hmunphiah hung atang a tuai-te-rek ho hi a chi atan a tlak loh. A puichang tha chauh phunchhuah atan a tlak a ni.

III.   A PHUN DAN

   i) Hmunphiah thlar te chu tuthawlh nen ft 9 danah thuk lutuk lova nghet taka phun tur a ni. Terrace zawl thlanglam leivung leh leitak inrina laiah phun tur a ni.

   ii) A chi lak atanga ni thum (3) ral hma ngeiin phun tur a ni a, a chi lakna hi nisa emtir tur a ni lo. Phun nghal mai loh tur phei chu changel hnah emaw hnimhnah te a khuh a tha.

   iii) Duhthusam ah chuan phun atanga darkar 24 ral hma ngeiin ruah sur thin sela. Hei vang hian fur intan June/July ah chauh phun nise. Ruah a sur loh pawhin, tui leih mai theih tura inrin a tha fo.

   iv) Hmunphiah hi a tualchher viau laiin, phunthar chawr hlim chu a no riau mai a, hnim lakah ven an ngai nasa a ni.

   v) Hmunphiah a phun a phun hi thlariat (8) ah an sengtheih a. June/July a phun kha, February thla ah chuan a thar a seng theih nghal a ni.

   vi) Kumkhatna atan chauh chuan hmunphiah hi buh nen a chin kawp theih a. Buh hmun hi a fai that chuan hmunphiah in a haw lem lo.

   vii) Hmunphiah kan seng zawh tawh chuan a kung kha sahtluk tur a ni. Hmunphiah kungbuk sahchhum hi, a chawr thar tam theihnan leh a kung sang lutuk tur venana tih a ni a. A sah hun dik leh a hmun a fai bawk chuan, thil tangkai tak a ni.

IV   HMUNPHIAH KEH

   i) December/ January thlaah keh tan ni sela, a thar hma dan a zirin February thla thleng pawh kai ila a pawi lo. Hmunphiah hralh tur keh hian, a parah hum a pawh dawh mai theih a nih lai hi a hun dik tak chu a ni. Vawikhat kehchhuah hnuah a dang keh alo hun leh zel a, vawithum/ Vawili keh theih a ni.

   ii) Hmunphiah ngau ngau thar tum tute tan chuan, hmunphiah keh zawh hnuah chuan hmunphiah kung te chu a bulah sam thluk a hnim dangte nen halfai mai tur a ni.

   iii) Hmunphiah keh zawh hnu hian, pa rilru nei tan chuan hmanna a la awm cheu a.
     a) Hmunphiah kehna hnu hi bawngchaw ah a la tha em em a ni.
     b) Hmunphiah kungte chu sah chhum a tel that a, paper mill a hralh theih a ni.

  iv) Hmunphiah kehsa chu chapdarhin phoro mai tur a ni a, zan daiin a tlak hnawng tur a ni    lo. hmuinphiah rawng a dan vek thin avangin.

   v) Hmunphiah phoro hi a pawimawh em em a, a ro chiang var tur a ni. chuti lo chuan    hmuarin a kap a, a mawih chhe leh thin. Ni nga (5) vel pho a ngai.

   vi) Hmunphiah ro hi thil kang duh tak a ni a, kangmei lakah fimkhur hle a ngai.